Nhu Prisidenti di Assembleia Nacional,
Mantenha pa Nhu.
Suma simplis cidadon, mbim da participaçom na bu mom di kussas ku ka na bai dirito na Terra.
Bo Partido PAIGC pidi no voto duranti ultimo ileiçom pa guia destino di no Povo, na basi di no Constituçom.
No cala, no suguta bos, no obi bos. Dia di voto no da PAIGC no voto, pa i Governa i na tira Guiné di fomi, di coitadeça ku di disipero.
Ma na lembranta Nhu Prisidenti di Assembleia Nacional di kuma, voto ku no da PAIGC i ka pabia no diskissi mau kussa ku PAIGC fassi na Guiné, no dal pabia no doja kuma PRS faci pior i kaba é ka sta preparado pa guia no Terra, pa guia no Povo.
Novo figura na puder suma Nhu Domingos Simons Perera, suma nhu Cipriana Cassama i éra um motivo di esperança.
Aos é kundumpai ku no sta na odja dentro di PAIGC, i pudi bim kusta bu partido karo na eleiçom ku na bim, i pudi bim kusta Paz na Guiné.
Nhu Prisidenti di Assembleia Nacional,
Mmisti lembranta kuma no sta ba li tudo na 7 di junho no odja ké ku passa na Guiné, kussas kumsa na Parlamento ku nhemer nhemer, i bim da ki ki da, té aos no ka panha pé di no kabeça.
Nhu Prisidenti di Assembleia Nacional,
Aos tudo mundo sibi kuma prublema na Guiné i JOMAV ku randjal. Tudo djintis sibi kuma JOMAV si ka bambu ba na costa di PAIGC, i ka na saiba di kalabus ku fadi pa i sedo Prisidenti di Guiné.
Na pidi Nhu Prisidenti di Assembleia Nacional, pa i toma si responsabilidadi pa Parlamento, primeiro instituçom politica di Guiné, pa é destitui JOMAV, pabia si JOMAV dichado, ora ku kumdumpai bim kudi, responsabilidadi di Nhu Prisidenti di Assembleia Nacional tambi na bim sta implicado.
Nhu Cipriano Cassama, faci força pa ka abuso continua sedo na Guiné, nim pa ka amanha storia bim julgau suma cumplice di situaçom ku bu pudiba salva.
Obrigado.
Anonimo
